Сімвалічна, сардэчна і вельмі цёпла — менавіта так можна апісаць гэту падзею. Сям’я Сяргея і Вольгі Дзеружынскіх атрымала вельмі адказны і ганаровы статус: іх маленькая дачушка Надзея стала адной з першых у раёне ўладальніц унікальнага падарунка ад Кіраўніка дзяржавы.

З гэтай знамянальнай падзеяй бацькоў прыйшлі павіншаваць ганаровыя госці. Старшыня Слаўгарадскага раённага аддзялення Магілёўскай вобласці Беларускай партыі «Белая Русь» Наталля Міхайлаўна Голік. Яна цёпла павіншавала матулю чароўным букетам кветак і ўручыла заветны драўляны куфар з галоўным сімвалам праекта, а таксама карысныя падарункі для дзяцей.

«Праект «Трэці — Бацькаў» асабліва сімвалічны ў Год беларускай жанчыны, — адзначыла Наталля Міхайлаўна. — Нараджэнне дзіцяці — гэта галоўны сэнс мацярынства, а з’яўленне трэцяга дзіцяці — асаблівая і вялікая радасць.

Да цёплых слоў і віншаванняў далучылася начальнік аддзела ЗАГС Марына Яўгеньеўна Нікіціна, якая ўручыла шчасліваму тату першы афіцыйны дакумент у жыцці малой — пасведчанне аб нараджэнні.

Сям’я Дзеружынскіх — выдатны прыклад працавітасці, мудрасці і вернасці роднай зямлі. Дома маленькую Надзечку з нецярпеннем чакалі старэйшыя брацік і сястрычка — Цімафей і Арына. Нягледзячы, што яны яшчэ малыя, але дапамагаюць бацькам, а Цімафей ужо зусім хутка ўпершыню сядзе за школьную парту.

Бацькі маленькай Надзеі былі расчулены да глыбіні душы і шчыра падзякавалі за такую ўвагу і падтрымку.

Оперативные и актуальные новости в нашем Telegram-канале. Подписывайтесь по ссылке!